"மருதாணி வீடு"...

குடைந்தெடுத்த கற்கோயில்

போல கம்பீரமாய் வீடு,

சத்தம் கூட புகா வண்ணம்,

சரளைக்கல் சுற்றுச் சுவர்!

அந்த வீட்டை தவிர்த்து

ஊருக்குள் வழி சொல்வது கடினம்!

அங்குள்ள தென்னைகளுக்கு

நூறுக்கு மேலிருக்கும்

வயசு,

என்பார் "சுருட்டை" மெல்லும்

கருப்பு மாமா!

கடைசியாக அவ்வீட்டை

கடக்கையில்,

நான்காம் தலைமுறையின்

பேரக்குழந்தைகள் விளையாடுவதை

வேடிக்கைப் பார்த்து கொண்டிருந்தது

அவ்வீட்டின் முற்றம்!

அறுபதடுக்கு மிடுக்கைத் தாண்டியும்

அவ்வப்போது வந்து போகும்

அந்த "மருதாணி" வீடு 

அயலகத்தின் தனிமை இரவுகளில்!

மூன்று வருடம் கழிந்து 

ஊர் திரும்புகையில் 

அவ்விடம் வந்ததும் 

அனிச்சையாய் தலை திரும்ப 

அதிர்ச்சியாய் இருக்கிறது,

அவ்வீட்டைக் கொன்று

இரண்டடுக்கில் சமாதியொன்றெழுப்பி,

"இன்பகமென்று" 

பெயர் சூட்டியிருக்கிறார்கள்!....  

Tweet